ESTASYON SA KRUS
March 14th, 2009ESTASYON SA KRUS
(Via Crucis)
Hinikay ni: Fr. Ted Milan D. Torralba
Unang Bahin
Sa kasinatian sa atong mga parokyano, pagsugod gayod sa Panahon sa Kwaresma, gihimo sulod sa atong mga simbahan ang Estasyon sa Krus kon Via Crucis (pinulongang Latin) matag Biyernes. Gihimo kini isip senemanang pamalandong sa pagsakit ug pagkamatay sa atong Ginoo nga si Jesuskristo didto sa balaang lungsod sa Jerusalem sa tuig 30 AD (o 33 AD). Pinaagi sa iyang pagsakit, hilabina sa iyang kamatayon, ang kamatayon mismo nabuntog na ug ang katawhan iyang natubos diha sa pag-ula niya sa iyang dugo diha sa krus.
Ang paghimo sa Estasyon sa Krus usa sa mga balaang tulumanon sa Kwaresma nga gidason sa Simbahan. Apan, dili lamang kini tulumanon nga hiniusa ang matag Katoliko mohimo gayod unta niini isip usa ka santosong debosyon sa usa sa mga misteryo ni Jesukristo.
KASAYSAYAN
Adunay masantosong tradisyon sa unang panahon nga human kuno sa pagkabanhaw ug pagkayab ni Jesus ngadto sa langit, ang iyang inahan nga si Santa Maria naghimo sa pagsuroy sa mga dapit o agianan nga giagian ni Jesus gikan sa Praetorium ni Pontio Pilato ngadto sa bungtod sa Kalbaryo sa iyang pagpas-an sa mabug-at nga krus. Bisan tuod nga ang balaang Kasulatan ug ang Apocrypha wala maghisgut niini, yano ug kinaiyahan gayod kadto sa usa ka inahan sa pagduaw sa mga dapit diin ang iyang anak nag-antos ug unya namatay.
Sa milabay nga mga katuigan, ang mga mituo ni Jesus sa nagkalainlaing dapit sa kalibutan nihimo sa pagbisita sa dapit diin si Jesus naglakaw padulong sa iyang kamatayon. Gisubay usab nila ang iyang giagian aron ila usab nga mabati kon unsa ug giunsa pagbati ni Jesus ang iyang gilaktan. Sa mga Katungang Katuigan, dala sa mga krusado kon crusaders sa ilang pakigbatok sa mga Moslem sa Jerusalem mao ang mga taho o sugyot mahitungod niining masantosong tradisyon. Busa, tungod kay dili man sayon ang pag-adto sa Jerusalem alang lamang niini, gihimo sa mga paring Dominikano ug sa mga Pransiskano ang pag-himo og replica sa agianan nga gilaktan ni Jesus sa panahon sa iyang pagpasakit ug pagkamatay.
Leave a Reply
You must be logged in to post a comment.