Tagbilaran Diocese Website

Gisugdan sa miaging Septiyembre 19, Sabado, ang siyam ka mga adlaw nga Nobenaryo pahinungod kang SAN LORENZO RUIZ DE MANILA, ang unang giproklamar nga Santo nga Pilipino sa atong Simbahan.
Si San Lorenzo Ruiz de Manila mao usab ang giila nga patron sa mga batan-ong Pilipino (Filipino Youth). Maoy hinungdan nga sa naandang kalihokan sa maong kapyestahan sa daghang mga parokya dinhi sa atong diyosesis, ang pag-han-ay niini gitugyan ngadto sa hugpong sa mga kabatan-onan (Youth Ministry).
Kinsa ba kini si San Lorenzo Ruiz de Manila?
Ania ang lakbit nga kasayoran kabahin kaniya: Natawo sa Agusto 10, 1605 didto sa Binondo, Manila. Ang iyang Amahan usa ka insek nga ginganlan og Sangley. Ang iyang inahan mao si Tagala nga usa ka Pilipina. Minyo siya, apan wala mahibaloi kon kinsay ngalan sa iyang asawa. Aduna silay tulo ka mga anak: duha ka mga lalaki ug usa ka babaye.
Sumala sa nakit-ang dokumento sa Parokya sa Binondo, si Lorenzo nakatapos sa pagtuon sa Doktrina Cristiana (Catechism) nga ubos sa pagdumala sa mga Paring Dominikano (Dominican Fathers). Nahimo siyang Monitor sa tulunghaan sa parokya ni San Gabriel sa Binondo. Sa iyang pagka-batan-on aktibo siyang nakiglabot sa Kapunongan sa Virgen del Rosaryo. Siya ang gisaligan sa konbento sa mga pari ug Escribano sa simbahan.
Usa si Lorenzo Ruiz sa mga gipadala ngadto sa nasud nga Hapon isip misyonero. Tungod sa iyang maisogong pagbarog sa pagtuong Kristohanon, siya, uban sa laing napulog lima (15) ka kauban, gipamatay isip mga martir.
Ang iyang mga kauban gilangkoban sa 9 ka mga Hapon, 4 ka mga Kastila, 1 ka Italyano, ug 1 ka taga-Francia.
Sa Pebrero 18, 1981, didto sa Rizal Park sa Manila, si Lorenzo Ruiz uban sa iyang mga kauban, giproklamar ni Papa Juan Pablo II nga BEATO. Sa Oktubre 18, 1987, didto sa Roma, giproklmar siya nga usa ka SANTO. Ang iyang pyesta saulogon sa matag Septiyembre 28.
Karong tuiga ang iyang kapyestahan mao ang adlaw nga Lunes. Hinoon adunay uban nga ilang gitunong sa Sabado o Domingo (Septiyembre 26 o 27).
Batonan nato ang lawom nga DEBOSYON kaniya!

This entry was posted on Saturday, October 24th, 2009 at 1:38 am and is filed under Documentation.