Tagbilaran Diocese Website

Ang Hanopol maoy kinadakuan nga barrio kaniadto sa Balilihan kansang pangalan gikan sa usa ka tanum nga mokatay nga naila sa iyang pagkabagon nga lig-on ug durable nga gitawa og “HANOPOW”.
Niadtong 1932, ang mga molupyo sa Hanopol nga mahigugmaon sa pag-ampo nagtukod ug kinadakuan nga kapilya sa tibuok Diyosesis nga karon maoy nahimong simbahan sa Parokya sa Sto. Niño sa Hanopol.
Gipangayo ug gihangyo and mahal nga Obispo nga mopadala og pari nga moalagad sa maalampuon nga katawhan sa Hanopol. Busa niadtong Enero 16, 1989, sa dihang nahimo na nga parokya ang Hanopol, si Reberendo Padre Florente Mendana maoy unang Kura Paroko (July 20, 1985 – April 30, 1989). Gisundan kini ni Reberendo Padre Leonel Grado sulod sa upat ka tuig (April 30, 1989 – June 1993). Si Reberendo Padre Robert Roa sulod sa usa kapin ka tuig (June 1993 – December 1994). Si Reberendo Padre Ariston Limocon sulod sa tulo ka tuig (December 1994 – November 20, 1997). Si Reberendo Padre Petronilo Ligtas Jr. sulod sa upat ka tuig (November 20, 1997 – June 1, 2001). Si Reberendo Padre Arnold Goder sulod sa upat ka tuig (June 1, 2001 – May 30, 2004).
Ang parokya nga may gilay-on nga 33 kapin ka kilometro gikan sa siyudad sa Tagbilaran ug mga 11 ka kilometro gikan sa lungsod sa Balilihan, adunay 763 ka bubong nga karon gibahin-bahin sa 73 ka Gagmayng Simbahanong Katilingban o BEC.
Si Reberendo Padre Alexander O. Nalitan sa pagka-karon maoy Kura Paroko.