Ika-Pito nga Domingo sa Ordinaryong Panahon (B) Pebrero 22, 2009
February 26th, 2009Ang Tawag
Ni Padre Jose “joesum” Sumampong, Jr.
—————————————————————
Ika-Pito nga Domingo sa Ordinaryong Panahon (B)
Pebrero 22, 2009
EBANGHELYO (Markos 2: 1–12)
1Paglabay sa pipila ka adlaw mipauli si Jesus gikan sa Capernaum, ug gidungog nga siya diha na sa ila. 2Busa nanugok ang daghan kaayong mga tawo ug tungod niini wala nay luna sa balay nga ilang kasudlan, bisan gani diha duol sa pultahan. Samtang si Jesus nagwali sa Maayong Balita, 3nangabot nga nagdalag usa ka paralitiko nga giyayongan ug upat ka tawo. 4Tungod sa kadaghan sa mga tawo, wala sila makaduol kang Jesus. Busa giukab nila ang usa ka bahin sa atop sa tungod gayod ni Jesus, ug ilang gitunton ang paralitiko nga naghigda sa iyang higdaanan. 5Nakita ni Jesus nga dako kaayo ang ilang pagtuo kaniya, busa miingon siya sa paralitiko, “Anak, gipasaylo na ang imong mga sala.” 6May pipila ka mga magtutudlo sa Balaod nga naglingkod didto, ug nakaingon sa ilang kaugalingon, 7“Nganong nangahas man siya pagpasipala sa Dios? Walay tawo nga makapasaylog sala, kondili ang Dios lamang!” 8Apan nasabot dayon ni Jesus ang ilang gihunahuna, busa miingon siya kanila, “Nganong naghunahuna man kamo sa ingon? 9Hain may masayon: ang pag-ingon ba ngadto sa paralitiko, ‘Ang imong mga sala gipasaylo na,’ o ang pag-ingon, ‘Bangon, dad-a ang imong gihigdaan ug lakaw’? 10Karon, ipaila ko kaninyo nga ang Anak sa Tawo adunay gahom dinhi sa yuta sa pagpasaylog sala.” Busa miingon siya sa paralitiko, 11“Bangon, dad-a ang imong gihigdaan ug pauli sa inyo!” 12Samtang nagtan-aw silang tanan, mibangon ang paralitiko, gialsa niya ang iyang gihigdaan, ug midali paglakaw. Hilabihan ang katingala sa mga tawo ug gidayeg nila ang Dios. Sila miingon, “Sukad masukad karon pa kita makakitag hitabo nga sama niini!” Ang Ebanghelyo sa Ginoo.
oOo
KAHULOGAN SA EBANGHELY0 (Markos 2: 1–12)
1…mipauli si Jesus… ug gidungog nga siya diha na sa ila. 2aBusa nanugok ang daghan kaayong mga tawo ug tungod niini wala nay luna sa balay nga ilang kasudlan, bisan gani diha duol sa pultahan.
Bisan pa unta nga si Jesus nanginahanglan og panahon sa pagpahulay human sa iyang pagwali sa Capernaum, ang daghang mga tawo nanugok ngadto kaniya. Bisan tuod daghang mga tawo ang nangita kaniya, apan ang mopatigbabaw nga pangutana mao kini: unsa kahay ilang tuyo sa pagpangita kang Jesus? Natugkad ba gayod nila kon unsa gayoy hinungdan sa ilang pagpangita ug panagtapok uban ni Jesus?
Si Jesus nasayod nga dili siya makasalig sa dakong panon sa mga tawo (crowd). Nasayran na ni Jesus nga kasagaran kanila dili pa makasabot sa tinuod nga hinungdan sa iyang misyon sa kalibutan. Kining mga tawhana lahi pa og gipaabot sa usa ka mangluluwas.
2bSamtang si Jesus nagwali sa Maayong Balita…
Ang pagwali sa Maayong Balita mahinungdanon kaayo alang niining mga tawhana bisan pa kon ang ilang gipaabot mao ang “milagro”.
Sa atong panahon karon, gihatagan og lawom nga pagtagad ang panggibuhaton sa pagwali sa Maayong Balita o Evangelization.
3nangabot nga nagdalag usa ka paralitiko nga giyayongan og upat ka tawo. 4Tungod sa kadaghan sa mga tawo, wala sila makaduol kang Jesus. Busa giukab nila ang usa ka bahin sa atop sa tungod gayod ni Jesus, ug ilang gitunton ang paralitiko nga naghigda sa iyang higdaanan. 5aNakita ni Jesus nga dako kaayo ang ilang pagtuo kaniya…
Sila si Mateo, Markos ug Lukas nagsaysay niini, apan si Markos lamang ang mitaho sa mga detalye.
Ang maong detalye gituyo aron makakaplag kita, sama sa nakaplagan ni Jesus, ang kadako sa ilang pagtuo. Ang pagtuo nagkinahanglan og paningkamot. Ug aron mahitabo ang milagro, anaa gayod ang maong klasing pagtuo!
5bbusa miingon siya sa paralitiko, “Anak, gipasaylo na ang imong mga sala.”
Katingalahan! Ang mga katawhan nagpaabot og milagro ug kini gipakita ni Jesus. Apan wala kini himoa aron lamang makit-an sa mga tawo kon dili tungod sa dakong pagtuo. Ang mahinungdanon dili mao ang unsay makita sa gawas—sama sa usa ka milagro; kondili ang anaa sa sulod sa kasingkasing sa tawo—ang pagtuo.
6May pipila ka mga magtutudlo sa Balaod nga naglingkod didto, ug nakaingon sa ilang kaugalingon, 7“Nganong nangahas man siya pagpasipala sa Dios? Walay tawo nga makapasaylog sala, kondili ang Dios lamang!”
Bisan pag kon bagohay pa si Jesus nga nagsugod sa iyang misyon, anaa na ang mga tawo nga mobabag kaniya. Si Markos nagpatataw sa iyang sinulat nga Ebanghelyo nga si Jesus daghan kaayog mga kaaway. Pipila niini, kabahin sa pagpasaylo sa sala (Mk 2: 1-12), kabahin sa Iyang pagkaon uban sa mga makasasala (Mk 2:13-17), kabahin sa iyang pagdumili sa pagpuasa (Mk 2:18-22), kabahin sa paglapas sa balaod sa Adlawng Igpapahulay (Mk 2:22-28), kabahin sa Iyang gibuhat nga supak sa Balaod (Mk 3:1-6).
Nagpakita kini sa usa ka kamatuoran nga ang kaayo nagkinahanglan gayod og pagsulay, sama sa bulawan nga sulayon pinaagi sa nagbaga nga kalayo.
Hangtud sa atong panahon karon, gisulay pa sa daghang mga tawo ang kabubut-on sa Dios. Anaay daghang mga hagit batok sa iyang Pulong.
10Karon, ipaila ko kaninyo nga ang Anak sa Tawo adunay gahom dinhi sa yuta sa pagpasaylog sala.” Busa miingon siya sa paralitiko,
Kini mao ang unang higayon nga si Jesus mitug-an mahitungod sa iyang pagka-Anak sa Tawo, nga maoy timaan sa katumanan sa gisaad nga Manunubos sa Basahon ni Daniel (Daniel 7:13-14). Gihatagan og pagtagad ang pulong “gahom” o “exousia” sa Griego nga mao ang pagpasaylo sa sala.
11“Bangon, dad-a ang imong gihigdaan ug pauli sa inyo!” 12Samtang nagtan-aw silang tanan, mibangon ang paralitiko, gialsa niya ang iyang gihigdaan, ug midali paglakaw.
Gigamit ang pulong “egeiro” nga maoy gigamit sa paglarawan sa pagkabanhaw.
12bHilabihan ang katingala sa mga tawo ug gidayeg nila ang Dios. Sila miingon, “Sukad masukad karon pa kita makakitag hitabo nga sama niini!”
Ang Dios angay gayod nga daygon!
— Gihan-ay ni : Padre Jose “ joesum” Sumampong, Jr.
Leave a Reply
You must be logged in to post a comment.