Tagbilaran Diocese Website

I. Pagbasa: Lk. 23: 35-43
Nagtindog didto ang mga tawo nga nagtan-aw, samtang nagbugalbugal kaniya ang kadagkoan sa mga Judio, nga nag-ingon, “Giluwas niya ang uban, paluwasa siya sa iyang kaugalingon, kon siya mao ang Mesiyas sa Dios.”
Gibugalbugalan usab siya sa mga sundalo; miduol sila ug gitunolan siya’g bino ug miingon, “Kon ikaw ang hari sa mga Judio, luwasa ang imong kaugalingon.” Sa ibabaw sa krus gisulat nila kining mosunod: “Kini siya mao ang hari sa mga Judio.”
Usa sa mga kriminal nga nagbitay didto mibugalbugal kaniya, “Dili ba ikaw man ang Mesiyas? Luwasa ang imong kaugalingon ug kami.” Apan gibadlong siya sa iyang kauban nga nag-ingon, “Wala ka ba mahadlok sa Dios? Kita ania dinhi gisilotan sa mao rang silot. Apan ang silot natong duha angay kanato, kay gisilotan man kita sibo sa atong nabuhat, apan siya walay sala.” Ug miingon siya kang Jesus, “Jesus, hinumdomi intawon ako kon maghari ka na!” Miingon si Jesus kaniya, “Sultihan ko ikaw, karong adlawa adto ka sa Paraiso uban kanako.” Ang Ebanghelyo sa Ginoo.

II. Pamalandong
“KARONG ADLAWA UBAN IKAW KANAKO NGADTO SA PARAISO.” Mga tam-is nga pulong sa pasalig nga gilitok ni Jesus ngadto sa nagbasol nga kriminal. Bisan pa man nakiglimbasog si Jesus sa tumang kasakit gumikan sa mga lansang nga milagbas sa iyang unod, nakahimo pa gihapon siya pagpamati sa pakilooy sa usa ka kriminal nga nagbitay tupad kaniya nagkanayon, “Jesus himundomi intawon ako kon maghari ka na!” Usa ka sinsero nga pangaliya ngadto sa usa ka tawo nga una pa lamang niyang gikahimamat apan gituohan nga usa ka manluluwas. Usa ka talagsaong yugto kanus-a nagtagbo ang tawhanong pakilooy ug sa diosnong kalooy ug pasaylo.
“KARONG ADLAWA UBAN IKAW KANAKO NGADTO SA PARAISO.” Mga pulong ni Jesus sa pagpasaylo nga mibuak ug miguba sa saba nga singgit sa pagbiay-biay ug pagbugalbugal sa mga katawhan nga nagsud-ong kaniya’ng nagbitay didto sa krus… “Kon siya mao ang Mesiyas nga pinili sa Dios, … kon ikaw ang hari sa mga Judio, luwasa ang imong KAUGALINGON!” Mao kini ang biaybiay sa mga tawo nga ilang KAUGALINGON lamang ang gitan-aw, giatiman ug gihataga’g pasidungog sa kinabuhi. Timaan kini nga nabutahan na gayud sila pag-ila sa Mesiyas nga nagbitay sa krus. Ang sala sa sobrang pag-atiman sa kaugalingon makapalong gayod diay sa panan-aw ug pagbati sa kahimtang sa uban. Kay nagpakamatay ba diay si Jesus tungod ug alang lamang sa iyang kaugalingon? Kay gipadala ba diay siya sa Amahan aron alagaran sa mga tawo. Ang iyang pagsunod sa kabubut-on sa iyang Amahan bisan pa man sa kamatayon sa krus maoy kinatumyan niyang pagpakita sa iyang GUGMA kanatong mga katawhan. Dili kini mabuhat bisan kinsang tawo kon ang KAUGALINGON lamang ang iyang gilantaw. Si Jesus mismo nag-ingon, “Kon buot ang usa ka tawo mahimo nga akong tinun-an, kinahanglan nga kalimtan niya ang iyang KAUGALINGON, pas-anon niya ang iyang krus ug mosunod kanako (Mk. 8: 34). Ang iyang pagdawat sa kamatayon sa krus maoy tataw’ng timaan nga iyang gikalimtan ang iyang kaugalingon aron sa pagluwas sa sala sa kalibutan.
Karong panahona nakasinati kita og pagkunhod sa ekonomiya. Angayan nga molantaw usab kita sa kaayohan sa uban. Magkahiusa kita sa pag-atubang niining kalisod sa ekonomiya. Hukason diha sa atong kaugalingon ang mga hinakog nga mga panglantaw o plano. Kahigayonan na kini nga atong ipalapad ang atong pagbati ngadto sa uban inay mag-iyahay kita ug isig-paniguro sa atong kaugalingong seguridad. Apan sigun sa atong kinaiya, panahon gani nga kita magkalisod, mogamay ug magkahanap ang atong panan-aw sa panginahanglan sa uban, ingon man mogamay ang atong kalibutan nga daw mao ray gihataga’g katungod nga mopahimulos sa kinaiyahang gasa sa Ginoo.
Mao ba kini ang kinaiya ni Jesus nga nagbitay sa krus nga napuno sa mga biay-biay sa mga tawo, “Kon ikaw ang mesiyas…, luwasa ang imong KAUGALINGON!” Tutuki pag-ayo ang iyang panagway! Nagdupa si Jesus nga daw gusto niya kitang gakson ug dalhon ngadto sa gisaad niya nga paraiso. Mao kini ang misyon ni Jesus dinhi sa kalibutan nga iya kitang giyahan padulong sa paraiso – mao ang gingharian sa iyang Amahan. Maangkon lamang nato kining paraiso kon maantigo kitang mamati, mosunod, ug mobuhat sa iyang kabubut-on. Ang kriminal, tungod sa paghukas sa iyang garbo ug paghikalimot sa iyang kagahapon, naangkon niya ang paraiso diha gayod mismo sa mga pulong nga gilibkas ni Jesus, “KARONG ADLAWA UBAN IKAW KANAKO NGADTO SA PARAISO.”
Ang mga panagbingkil, kasamok, kalibutanong bahandi, dungog, ug gahom ba ang makapahatod kanato paingon sa gisaad nga paraiso? Ang paraiso nga gihisgotan ni Jesus wala sa atong mga kamot. Labaw na nga dili kini makita sa bahandi, hinagiban, ug gahom niining kalibutana. Daghan kanato nga nagtoo nga matagamtaman ang tinuod nga paraiso diha sa naggilak nga bulawan ug makalukmay nga lingla sa gahom. Mao kini ang hinungdan nga nisamot ang kadako sa “gap” tali sa adunahan ug kabus sa atong nasud. Kini sukwahi gayod sa plano ug kabubut-on sa Ginoo nga pipila lamang ang makapahimulos sa Iyang gasa.
“KARONG ADLAWA UBAN IKAW KANAKO NGADTO SA PARAISO.” Mga pulong nga naghupay sa magul-anong kasingkasing sa kriminal. Naangkon niya ang paraiso tungod sa iyang pag-angkon ug paghinulsol sa iyang mga sala. Diha mismo sa kasingkasing sa kriminal nagsugod ang iyang panaw padulong sa kaluwasan. Diha mismo sa iyang kasingkasing nga mahinulsulon nahimugso ang paghari sa Dios. Sa ato pa, kon mangandoy kita’g kalamboan, kausaban, ug kahiusahan magsugod kini sa tagsa-tagsa nato nga kasingkasing. Ang kausaban ug kalamboan sa atong katilingban nagdepende sa pag-usab sa atong kaugalingon. Bisan pa man unsa kita kamabalhinon sa atong kasingkasing ug hunahuna, apan dili pa ulahi ang tanan. Gihatagan pa kita sa Ginoo og luna alang sa paghinulsol ug pagbag-o sa atong kaugalingon. Si Jesus nagpaabot sa atong pagbalik ngadto kaniya. Andam siya nga mopasulod kanato kon bukas usab ang atong kasingkasing sa iyang grasya.

This entry was posted on Saturday, April 18th, 2009 at 12:00 am and is filed under Documentation.