Tagbilaran Diocese Website

I. Pagbasa: Jn. 19: 25-27
Duol sa krus ni Jesus nagbarog ang iyang inahan ug ang igsoon sa iyang inahan, si Maria nga asawa ni Cleopas, ug si Maria Magdalena. Sa pagkakita ni Jesus sa iyang inahan ug sa tinun-an nga iyang gimahal nga nagbarog didto, miingon siya sa iyang inahan, “Babaye, ania ang imong anak.” Ug miingon siya sa tinun-an, “Anak, ania ang imong inahan.” Sukad niadto gipatipon si Maria pagpuyo sa tinun-an. Ang Ebanghelyo sa Ginoo.

II. Pamalandong

Matag Semana Santa atong nadungog sa Radio ug makita sa Television ang mga drama ug sugilanon sa kinabuhi sa atong Ginoong JesuKristo ug sa iyang nga tinun-an. Ang tuyo niini aron mamahimong bag-o ug lab-as sa atong mga hunahuna ug kasingkasing ang kinabuhi ug pagtulon-an sa atong Ginoo. Gani usa ka inahan misaysay sa iyang kasinatian mahitungod sa iyang anak nga babaye nag edad pa lamang og siete anyos, nga nagtan-aw sa mga kasakit nga nahiaguman ni Jesus ug sa tumang pagbasol ni Judas Iscariote sa iyang pagbudhi sa iyang maayong magtutudlo, nga nagapamukpok sa iyang dughan, nga wala masayod kon asa siya paingon ug kinsa ang iyang pangayo-an og tabang? Ang maong bata mihilak tungod sa iyang tumang kalooy dili lamang kang Jesus, kon dili usab sa gidangatan ni Judas, miduol siya sa iyang inahan nga nagkanayon, “Nay, nganong wala man siya modangop ug mangayog tabang ngadto kang Mama Mary.” Ug dayon gakos sa iyang minahal nga inahan.
Mga minahal kong igsoon ni Kristo, kining maong bata, bisan pa sa iyang kalinghod sa panuigon, nagpahinumdum kanato sa bililhong katungdanan ni Birhen Maria sa atong mga kinabuhi, isip atong espirituhanong inahan, nga andam kanunay motabang ug mogiya kanato, labi na sa panahon sa atong mga kasakit ug suliran sa kinabuhi.
“BABAYE, ANIA ANG IMONG ANAK; ANAK, ANIA ANG IMONG INAHAN” pulong nga gikan sa ngabil sa atong manunubos nga nagbitay sa krus, nga sa tumang kasakit nakigharong sa sala ug sa kamatayon alang sa atong kaluwasan. Iyang gitugyan ang iyang pinanggang inahan ngadto sa iyang gimahal nga tinun-an aron mamahimong IYANG INAHAN, MAGTATABANG ug GIYA sa iyang panaw sa kinabuhing Kristohanon. Sukad niadtong higayuna si Birhen Maria nahimong inahan sa mga minahal nga tinu-an ni Kristo, ug ang tanan nga mga sumusunod ni Kristo nahimong mga pinanggang anak ni Maria. Kining maong kamatuoran giampingan ug gipamatud-an sa dili maihap nga kasinatian sa buhing katawhan sa Dios latas sa liboan ka katuigan. Isip pag-ila niining maong bililhong katungdanan ni Birhen Maria sa atong kinabuhi, Ikaduhang Konsilyo Vaticano, kapitulo Otso, mitawag kaniyag “Inahan sa mga magtutuo” (Mother of the faithful). Nahimo siyang atong inahan dili sa lawasnon o tawhanon paagi, kondili sa “han-ay sa grasya” (“in the order of grace” Lumen Gentium, 61), kay ang iyang pagka-inahan kabahin man sa misyon ug pagpangalagad sa iyang anak nga si Jesus, alang sa kabag-ohan ug kaluwasan sa tibuok kalibutan.
Sa atong panahon karon, atong nasinati ang Global economic crisis, ug dinhi sa atong pinanggang nasud nga Pilipinhon ato usab gisagubang ang krisis sa atong moralidad, ang pagpasulabi sa mga bakak ug walay kaangayan, walay panaghiusa ug pagtinabangay. Mura nag walay direksiyon ang atong kinabuhi. Ang atong mga pangulo sa atong Pangagamhanan, ug bisan gani sa Simbahan, wala magkahiusa. Wala na kita masayud kon kinsa kanila ang atong tuhoan ug pagasundon, kay wala pod kita masayud kinsa kanila ang nagasulti sa matuod. Daghang mga krimen o salaod sa atong katilingban nga wala kahatagig kaangayan kay ang ato man gipalabi mao man ang personal nga kaayohan ug dili ang kaayohan ug kalambuan sa kadaghanan. Niining mabug-at ta nga suliran, asa man kita modangop? Kinsa man ang mogiya kanato? Ug kinsa man ang angayan nga atong pangayoag tabang? Ang Dios! O, tinuod kana. Siya lamang ang atong kadangpan, apan ang Dios nga nagpakatawo, nagsangyaw ug namatay, alang sa atong kaayohan ug kaluwasan, nitugyan kanato ngadto sa inahanong panabang ug giya ni Birhen Maria sa pag-ingon: “BABAYE, ANIA ANG IMONG ANAK; ANAK, ANIA ANG IMONG INAHAN.”
Ang pagka-inahan ni Birhen Maria kanato wala matapus sa iyang pagpasaka sa langit. Kay matud pa sa Ikaduhang Konsilyo Vaticano: “ang pagka-inahan ni Maria diha sa han-ay sa grasya, nagsugod sa iyang pagsanong sa mensahe sa anghel nga si Gabriel nga magsabak siya sa Anak sa Dios, nagpadayon kini sa iyang walay paglunga didto sa tiilan sa Krus, ug magpadayon hangtud nga makab-ot sa mga piniling katawhan ang tunhay nga kaluwasan. Sa iyang pagsaka sa langit – lawas ug kalag – nagpadayon siya sa iyang hingpit nga katungdanan sa pag-ampo, pagtabang ug paggiya kanato ngadto sa mga grasya sa kaluwasan nga walay katapusan” (Lumen Gentium, no. 62). Mao kini ang hinungdan ngano nga hangtud karon, bisan siya atoa na sa langit, matag karon ug unya, moanhi siya sa yuta pinaagi sa mga aparisyon aron atong masinati kanunay, ang iyang inahanong panabang ug paggiya kanatong iyang mga anak nga nagpanaw sa kalibutan nga madanglog. Ubani ako ninyo sa pagpamalandong sa inahanong pahimangno ug paggiya ni Birhen Maria kanato pinaagi sa pagbalik-lantaw sa pipila ka mga lugar, diin ang atong Mahal nga Inahan mipakita ug mihatag sa iyang mensahe alang kanato aron kining atong mga mabug-at nga suliran, labi na sa atong nagkatun-as nga moralidad, mahatag kahupayan ug kasulbaran. Ang pagpakita ni Birhen Maria sa Guadalupe, Mexico sa tuig 1531; sa Lourdes, Fransya sa tuig 1858; sa Fatima, Portugal sa tuig 1917; sa Medjugorje, Yugoslavia sa tuig 1981 ug uban pang mga lugar, ang iyang mensahe alang kanato malangkod lamang niining sumusunod: “BALIK KAMO SA DIOS PINAAGI SA PAGTUO, PAGBAG-O SA INYONG KINABUHI, UG PAGPENITENSIYA PINAAGI SA BUHAT SA KALOOY NGADTO SA UBAN” (Dictionary of Mary, pp. 35-40). Kining maong inahanong mensahe sa atong Mahal nga Inahan, nagpahinumdom lamang kanato sa milanog nga mensahe sa Ebanghelyo ni Kristo nga nagdapit kanato nga nag-ingon: “Hinulsoli ug biyai ang inyong mga sala ug tuohi ninyo ang Maayong Balita” (Mk 1:15).
Mga minahal kong igsoon ni Kristo, atong nakita nga ang atong Mahal nga Inahan, wala magkulang sa iyang katungdanan sa pag-ampo, pagtabang ug paggiya kanato nga iyang pinalanggang mga anak. Isip mga anak ni Birhen Maria, unsa may atong tubag sa iyang inahanong pagmahal ug pahimangno kanato? Unsa may atong buhaton aron kining inahanong tambag ug mensahe sa atong Mahal nga Inahan mamahimong sinugdanan sa atong kabulahanan ug kasulbaran sa atong nagkagidlay nga moralidad? Ug labaw sa tanan, unsa may atong ikatampo alang sa kaayohan ug sa kalambuan sa atong Gagmayng Kristohanong Katilingban, sa atong lungsod ug sa atong nasud? Ang atong tubag niining maong mga pangutana maoy magpamatuod kanato nga kita mga minahal nga tinun-an ni JesuKristo ug mga pinanggang anak ni Birhen Maria.

This entry was posted on Thursday, April 23rd, 2009 at 9:21 pm and is filed under Documentation.