On Fiestas by Fr. Joesum
April 17th, 2009<!– @page { size: 21cm 29.7cm; margin: 2cm } P { margin-bottom: 0.21cm } –>
Ang pyesta nahimong nang dakong kabahin sa kulturang Bol-anon. Labi na gayod sa bulan sa Mayo, wala gayoy adlaw nga walay pyesta nga saulogon. Diha sa tibuok lungsod, parokya, o kaha sa usa ka barangay, o kapilya sa sitio. Aduna gani mga family devotional fiesta.
Ang lungsod ug parokya sa Corella, mangsaulog sa ilang kapyestahan karong umaabot nga Abril 27, Lunes. Sundan kini sa Dakbayan sa Tagbilaran ug Katedral ni San Jose sa Mayo 1, Biyernes. Kini maoy sinugdanan sa daw dili maihap nga mga pyesta sulod sa bulan sa Mayo.
Makita sa tanang relihiyon ang kapyestahan. Usa kini ka esensyal nga elemento sa pagtuo ug pagsimba. Ang mga katawhan mohatag og pagtahod kasagaran inubanan sa espiritu sa kalipay nga nagsukad sa mga nagkadaiyang panghitabo sa kinabuhi. Sa maong higayon ang mga katawhan mohalad sa ilang mga pasalamat ug mangayo og panalangin gikan sa Balaang Gahum kon Divinity.
Ilhanan sa mga pyesta nga anaa nahisulat sa Balaang Kasulatan mao ang ilang kadugtongan sa balaang kasaysayan o sacred history. Gitawag kini og balaang kasaysayan tungod kay adunay kalabotan ang Dios kinsa sa kanunay nagbuhat og panghitabo sa ngalan sa iyang mga piniling katawhan. Apan usab kining mga pyesta may kalabotan sa kahiusahang kasinatian sa katilingban (sama nga sa atong panahon karon: gumikan sa panabang ni San Roque gipanalipdan batok sa mga katalagman, o ilang gitahan ang ilang kaugalingong umahan ngadto kang San Isidro, o ilang gitahan ang ilang pagbiyahe ngadto kang Maria, Nuestra Seňora de la Paz y Buen Viaje, ug uban pa).
Adunay tulo (3) ka mga aspeto sa kasaulogan sa pyesta:
Una. Usa ka kasaulogan nga nagmantala sa dakong buhat sa Dios. Ang mga Israelita modayeg sa Dios pinaagi sa paghatag niini og daghang mga titulo. Sa adlaw nga sabath sila nagpahinungod sa Dios nga Magbubuhat o Creator (Ex 20:11). Ang pyesta sa Pagsaylo o Passover gisaulog alang sa kapasidunggan sa Dios nga Mangluluwas o Deliverer (Dt 5:12-15; 16:1). Ang pyesta sa mga Tolda o Tents naghandum sa ilang paglawig didto sa kamingawan ug sa kasabutan tali kanila ug sa Dios (Lv 23:42). Ang pyesta sa mga semana o Weeks o Pentecost may kalabotan sa ilang paghandum sa paghatag sa Dios sa Balaod ngadto kang Moises didto sa bukid sa Sinai (Dt 26:5-10).
Ikaduha. Usa ka malipayong pagpaabot sa kaugmaon. Ang mga katawhan naglaum nga moabot ra gayod ang hustong panahon nga anaa ang hingpit nga kaluwasan. Ang gibuhat sa Dios kaniadto maoy ilhanan nga siya mohimo usab ang daghan pang mga maayong butang sa unahan. Ang pyesta sa Exodus mao ang timaan nga adunay pay laing Exodus diin ang Dios modala kanila ngadto sa hingpit nga kagawasan (Is 43:15-21; 52:1-12; 55:12 ff.).
Ikatulo. Usa ka kahigayonan nga ikasumbong ngadto sa Dios kon unsay panginahanglan sa panahon karon. Kining aspetoha mao ang nagkinahanglan sa mga mahinulsulon ug malinis nga kasingkasing. Ang pyesta sa pagbayad o Expiation nagbatbat sa tinguha alang sa pagbag-o sa kinabuhi (Ps 106; Ne 9:5-37; Dn 9:4-19). Ang mga propeta nagpahinumdum nga dili sakto ang pagpyesta kondili masabtan ang tinuod nga kahulogan nga mao ang pagsinati sa buhing Dios (Ex 19:17).
Leave a Reply
You must be logged in to post a comment.