Tagbilaran Diocese Website

Liturhikanhong Kahulogan
(Ika-Unom nga Domingo sa Tuig-B)

Tema: ANGAYAN BA NGA LIKAYAN ANG UBANG MGA TAWO?
Ang mensahe karon mao nga si Cristo mihikap niadtong tawo nga angay likayan sa paghikap uban sa iyang makaalim nga gahum. Karon ang matag-usa kanato mamalandong kon makapila kaha kita hikapa ni Cristo sa atong kinabuhi. Siya mihikap kanato uban sa iyang gugma diha sa bunyag diin giluwas kita gikan sa atong pagkahimulag ngadto sa pagkasakop sa Kristohanong katilingban. Iya kitang gihikap sa matag higayon nga makig-uban siya kanato diha sa Eyukaristiya aron sa paghinabi kanato ug sa pagtugyan kanato sa iyang lawas. Mihikap siya kanato uban sa iyang makaalim nga pasaylo, uban sa iyang kaluoy sa mga panahon sa kalisdanan, uban sa iyang kusog kon kita anaa sa kaluya, uban sa iyang kaalam kon kita anaa sa kalibog. Apan ato bang gitugotan sa Jesus sa paghikap kanato? Ug ato ba usag nga gihikap ang usag-usa uban sa Diosnong pag-amuma?

UNANG PAGBASA (Levitico 13:1-2, 44-46)
Diha sa Daang Testamento, gipakadak-an sa mga katawhan ang kaputli nga matan-awan sa lawas sa tawo. Tungod niini may mga tawo nga ilang gisalikway tungod sa mga seryosong sakit sa panit. Lahi si Cristo kay siya mihatag og dakong pagtagad sa kaputli sulod sa kasingkasing.

IKADUHANG PAGBASA
(1 taga-Corinto 10:31-11:1)
Si San Pablo makusganong mipugos nga si Cristo nagluwas sa mga katawhan gikan sa dili makataronganong kasugoan sa Daang Balaod. Kinahanglan nga kitang mga Kristiyanos mopadayag sa gugma niadtong wala pa makasabot sa tinuod nga kahulogan sa kagawasan.

This entry was posted on Friday, February 13th, 2009 at 9:25 pm and is filed under Gospel Reading.