Tagbilaran Diocese Website

PANAN’AWON SA LANTAWAN
Hinikay ni Padre Ramon Jose Oncog, JCL

Pangutana:. Unsa man ang kalainan tali sa trial marriages ug de facto unions? Unsa pud ang kalainan sa communion ug spiritual communion? Salamat.

Tubag:
Ang trial marriages ug de free facto unions apil sa lima ka irregular situations nga gihisgotan ni Papa Juan Pablo II sa iyang sulat Familiaris Consortio (22 Nobyembre 1981). Ang laing tulo mao ang mga Katoliko nga gikasal lamang sa sibil – nga maoy gihisgotan nato sa miagi, ang bulag o divorced apan wala nagminyo sa lain, ug ang bulag unya naminyo sa lain.
Ang trial marriage ug de facto free union pareho nga mao ang gitawag nato sa binisaya nga pagpuyopuyo. Ang kalainan lang nila mao ang intensyon. Sa trial marriage, ang magtiayon modesider sa pagpuyopuyo aron pag-aninaw kun mosalir ba ang ilang relasyon ug usa pa sila modesider pagpakasal. Niining paagiha, mora sila ug gahimo ug experiment o trial. Dakong sayop kini tungod kay ang hataas nga dignidad sa tawo nangayo nga dili siya duwaduwaan o himoon nga experiment. Ang hataas niya nga dignidad nangayo nga higugmaon siya sa hilabihan - paghatag sa kaugalingon nga walay limitasyon sa panahon ug sirkumstansya. Lain pa, ang kaminyoon sa duha ka binunyagan simbolo sa panaghiusa ni Kristo ug sa iyang katawahan – usa ka kahiusahan nga dili trial o temporaryo kundili maunongon hangtud sa hangtud.
Ang de facto free union mao ang pagpuyopuyo diin walay intensyon sa pagminyo sa simbahan o sa sibil. Aron masuta ngano nga sayup kini, basaha ang dokumento sa Pontifical Council for the Family nga giulohan ug Family, Marriage and “De Facto” Unions (26 Hulyo 2000). Mabasa kini sa Vatican website - www.vatican.va. Moingon lang ako dinhi nga ang pagpuyopuyo wala maghatag ug kasiguradohan sa kaayohan sa magtiyaon ug sa ilang mga anak. Pinaagi sa kasal, ang bana ug asawa modawat ug kaakohan atubangan sa publiko. Ang publiko nga pagdawat sa maong mga kaakohan naghatag ug mas dako nga kasiguradohan nga ang magtiayon maningkamot gayud alang sa kaayohan sa usag-usa ug nga ang ilang mga anak makadawat sa ensakto nga paghulma. Ang mga hiyas sa maayo nga pakigrelasyon sa isigkatawo mas maugmad diha sa usa ka lig-on ug malungtaron nga kaminyoon. Maingon diay nato nga ang pamilya nga binase sa kaminyoon (ug dili sa pagpuyopuyo) usa ka bililhon nga kaayohan alang sa katilingban. Lain pa, diha sa pagpuyopuyo anaa ang posibilidad sa pag-abuso sa gasa sa sekso (sex). Sa iyang paghatag niini sa tawo, kabubut-on sa Ginoo nga gamiton nato ang maong gasa sulod lamang sa kaminyoon. Mao man gani nga gihinganlan nato kini nga “buhat sa mga minyo.”
Sama sa mga naminyo lang sa sibil, ang mga Katoliko nga anaa sa trial marriages ug de facto unions dili angayan nga molinya panahon sa pangalawat. Dili usab sila hatagan sa absolusyon panahon sa Kumpisal hangtud dili nila korihian ang ilang sitwasyon. Hinoon, aron magiyahan sila padulong sa maong desisyon, gidapit sila sa pagpahimulos sa ubang mga pamaagi sa pag-ambit sa kinabuhi sa Simbahan, sama sa pagtambong sa Misa ug paghimo sa spiritual communion panahon sa pangalawat, pagpamalandung sa Balaang Kasulatan, pag-ampo, pag-apil sa mga kalihokan sa mga kapunongang relihiyoso, ug uban pa.
Ang communion mao ang pagdawat sa real presence sa Ginoo pinaagi sa pagkalawat sa iyang lawas ug dugo sa dagway sa ostiya ug bino. Kasagaran himoon kini sulod sa selbrasyon sa Santos nga Misa. Ang spiritual communion mao ang pagpadayag sa gitawag ni Santo Tomas Aquino nga “ardent desire to receive Jesus in the Most Holy Sacrament and in lovingly embracing Him.” Diha sa spiritual communion, mapaubsanon kitang mohangyo sa Ginoo nga mosulod sa atong kasingkasing sa paagi nga tabla ra nga atong gikalawat ang iyang Lawas ug Dugo panahon sa Misa. Buhaton nato kini panahon sa pangalawat kun dili kita angayan mokalawat o bisan kanus-a o bisan makapila pa sa tibuok adlaw. Mahimo kini nato pinaagi sa pag-ampo ginamit ang kinaugalingon nga pulong o ginamit ang tradisyonal nga pag-ampo ni San Alfonso Liguori nga nag-ingon: My Jesus, I believe that You are present in the Most Holy Sacrament. I love You above all things, and I desire to receive You into my soul. Since I cannot at this moment receive You sacramentally, come at least spiritually into my heart. I embrace You as if You were already there and unite myself wholly to You. Never permit me to be separated from You. Amen.

This entry was posted on Saturday, October 24th, 2009 at 12:39 am and is filed under Question and Answer.