PANAN’AWON SA LANTAWAN
October 24th, 2009Hinikay ni Padre Ramon Jose Oncog, JCL
Pangutana: Padre. Mangutana lang unta ko kung sala ba ang adunay bisyo sama sa pag-inum ug panigarilyo? Unsa pud ang mga kasagaran nga sala nga wala hunahunaa sa tawo pero sala na diay kini…kanang pareho ba sa mokaon nga maghukas?
Tubag: Usa sa mga kondisyon aron matawag nato ang usa ka binuhatan nga usa ka sala, mao nga kini supak sa balaod sa Dios. Karon, kun nangaligo sa dagat unya nangaon nga naghukas, supak ba kana sa balaod sa Dios? Ang mga lumad sa kalasangan nga nagbahag lang inig pangaon, nakasupak ba sa balaod sa Dios?…Ang akong punto mao nga ang paghukashukas samtang magkaon dili kinahanglan nga isipon nato nga sala. Sa labing dautang pagkabutang, usa lamang kini ka pagsupak sa kostumbre, social conventions o rules of etiquette sa katilingban - pananglitan, maghukas ka nga mokaon sa restawran. Niining higayona aduna tingali sala. Pero, ang sala dili mao ang paghukas nga nagkaon kundili ang wala paghatag ug respeto ug konsiderasyon ngadto sa uban nga anaa sa maong kan-anan. Paghigugma sa isig ka tawo - mao kini ang balaod sa Dios ug sala ang pagsupak niini.
Ang pagdagmal sa lawas supak sa ikalima sa Napulo ka Sugo sa Dios. Mao kana nga ang Catechism of the Catholic Church (CCC) #2290, miingon nga sala ang sobra nga panigarilyo ug pag-inum. Hinoon, posible nga maminusan ang pagkasala niini kun dili na gawasnon ang tawo nga nagbisyo. Kini mahitabo kun ang tawo addicted na kaayo sa tabako o inum. Dili na siya gawasnon tungod kay wala na man siyay abilidad sa pagkontrol sa kaugalingon. Hinumduman nato nga niining sitwasyona, wala mawala ang sala; nakonhuran lang.
Kun ang tawo aduna man gani niining bisyo, motambag ko niya nga makigstorya ug pari aron mabanabana kun unsa kabug-at ang iyang sala ug unsa kasubsub kinahanglan siya mokumpisal. Ang Simbahan nagdasig nga atong ikumpisal ang atong mga salang benyal aron ang grasya sa sakramento makaayo kanato ug makalig-on kanato batuk sa mga tentasyon (CCC #1458).
Walay sala ang igoigo lang nga pagpahimulos sa sigarilyo ug inum. Gani si Jesus mismo miinom ug migamit sa bino sa iyang mga sambingay (Lk.7:34, Mk.2:22), ug daghan pang bersikulo sa Biblia nagdayeg sa kalami sa ilimnun.
Leave a Reply
You must be logged in to post a comment.